தமிழ் திரையுலகில் நடன இயக்குநர், நடிகர், இயக்குநர் என பன்முகத்திறமைகளைக் காட்டி தனக்கென தனி முத்திரை பதித்தவர் ராகவா லாரன்ஸ். திரையுலகைத் தாண்டி ஏழை எளிய குழந்தைகளுக்கு கல்வி மற்றும் மருத்துவ உதவிகளை வழங்கி நிஜ வாழ்க்கையிலும் ஹீரோவாக வலம் வரும் அவர், தற்பொழுது தனது அதிகாரப்பூர்வ அரசியல் பிரவேசம் (Political Entry) குறித்த அதிரடியான வீடியோ ஒன்றை எக்ஸ் (X) தளத்தில் வெளியிட்டு ஒட்டுமொத்த தமிழக அரசியல் மற்றும் சினிமா வட்டாரங்களை அதிர வைத்துள்ளார்.
முன்னதாக, இயக்குநர் இமயம் பாரதிராஜாவின் திடீர் மறைவு காரணமாகத் தனது அரசியல் அறிவிப்பைத் தற்காலிகமாக ஒத்திவைத்திருந்த லாரன்ஸ், தற்பொழுது “பலனை எதிர்பார்க்காமல் உங்கள் கடமையைச் செய்யுங்கள்” (Do your duty sincerely, without expecting anything in return) என்ற தாரக மந்திரத்துடன் இந்த வீடியோவை பகிர்ந்துள்ளார். அந்த வீடியோவில், “நான் அரசியலுக்கு வருவேன் என்று நினைத்துப் பார்க்கவில்லை, பணம் சம்பாதிக்கவோ பதவியைப் பிடிக்கவோ எனக்கு ஆசை இல்லை. ஆனால், தற்போதைய சூழ்நிலைகள் என்னை இந்த முடிவை நோக்கி தள்ளியுள்ளன” என உருக்கமாகப் பேசியுள்ளார்.
Do your duty sincerely, without expecting anything in return.
After watching this video, please share your advice and guidance in the comments. If you say “No,” I will not enter politics and will continue my selfless service to society. But if you say “Yes,” I am ready to enter… pic.twitter.com/VwPFjdaUqy
— Raghava Lawrence (@offl_Lawrence) June 12, 2026
மேலும், தனது அரசியல் வருகையை முழுமையாகத் தனது ரசிகர்கள் மற்றும் பொதுமக்களின் முடிவிற்கே விட்டுள்ளார் லாரன்ஸ். “இந்த வீடியோவை முழுமையாகப் பார்த்துவிட்டு கமெண்ட் செக்ஷனில் உங்களது வழிகாட்டுதலை வழங்குங்கள். நீங்கள் ‘வேண்டாம்’ (No) என்று சொன்னால் நான் அரசியலுக்கு வரமாட்டேன், எனது அறக்கட்டளை மூலம் சமூக சேவையை மட்டும் தொடர்வேன். ஒருவேளை நீங்கள் ‘ஆம்’ (Yes) என்று கூறினால், நான் அரசியலில் களம் இறங்கத் தயார். நான் எப்பொழுது, யாருடன் இணைந்து இந்த பயணத்தைத் தொடங்குகிறேன் என்பதை உங்கள் ஆசிர்வாதத்துடன் விரைவில் அறிவிப்பேன்” என்று ஓப்பனாக சவால் விடுத்துள்ளார்.
தற்போதைய அரசியல் வட்டாரத் தகவல்களின்படி, அண்மையில் நடந்து முடிந்த 2026 சட்டமன்றத் தேர்தலில் இரண்டு தொகுதிகளில் வென்று தற்போதைய தமிழக முதலமைச்சராகப் பொறுப்பேற்றுள்ள சி. ஜோசப் விஜய் (CM Vijay) தனது திருச்சி கிழக்கு சட்டமன்றத் தொகுதியை அண்மையில் ராஜினாமா செய்தார். இதனால் காலியாகியுள்ள அந்த தொகுதிக்கு விரைவில் இடைத்தேர்தல் வரவுள்ள நிலையில், தமிழக வெற்றி கழகம் (TVK) சார்பில் ராகவா லாரன்ஸ் அங்கு வேட்பாளராகக் களம் இறங்க அதிக வாய்ப்புகள் இருப்பதாகத் தீவிரமாக விவாதிக்கப்பட்டு வருகிறது. ‘சேவையே பரம தர்மம்’ (#ServiceIsGod) என்ற ஹேஷ்டேக்குடன் லாரன்ஸ் வெளியிட்டுள்ள இந்த வீடியோ, தற்பொழுது சோசியல் மீடியாவில் லட்சக்கணக்கான கமெண்டுகளுடன் பயங்கரமாக ட்ரெண்டாகி வருகிறது.
