இந்திய அரசியல் களத்திலும், சோசியல் மீடியாக்களிலும் கடந்த சில தினங்களாக ஒட்டுமொத்த இளைஞர்களையும் ஆக்கிரமித்து மிரட்டி வரும் ஒரே பெயர் ‘காக்ரோச் ஜனதா பார்ட்டி’ (Cockroach Janta Party). உச்ச நீதிமன்ற தலைமை நீதிபதி சூர்யகாந்த் அவர்கள் வேலைவாய்ப்பு இல்லாத இளைஞர்களை ‘காக்ரோச்சுகள்’ (கரப்பான்பூச்சிகள்) என விமர்சித்ததாகக் கிளம்பிய சர்ச்சையை அடுத்து, அதற்குப் போட்டியாக இளைஞர்களால் உருவாக்கப்பட்ட இந்த நையாண்டி இயக்கம் தற்பொழுது இன்ஸ்டாகிராமில் பாஜகா போன்ற பெரிய கட்சிகளை விட அதிக ஃபாலோவர்ஸ்களை பெற்று மாஸ் காட்டி வருகிறது. இந்த நிலையில், இந்த ட்ரெண்டில் நேரடியாகக் குதித்து பிரதமர் மோடியை செம கலாய் கலாய்த்துள்ளார் நடிகர் பிரகாஷ் ராஜ் (Prakash Raj).
பிரகாஷ் ராஜ் தனது எக்ஸ் (X) மற்றும் இன்ஸ்டாகிராம் பக்கத்தில், தான் மாம்பழம் சாப்பிடும் வீடியோ ஒன்றை வெளியிட்டு, “காக்ரோச் மாம்பழம் சாப்பிடுது.. யம்மி” (Cockroach eating mangoes.. yummy) என்கிற பவர்ஃபுல்லான கேப்ஷனைப் போட்டுப் பகிர்ந்துள்ளார். அந்த வீடியோவில் மாம்பழத்தை கட் செய்து, அதில் ஐஸ்கிரீம் கலந்து சாப்பிடும் பிரகாஷ் ராஜ், “என்ன மோதி ஜி? மாம்பழத்தை இப்படி கட் பண்ணி, அதுல ஐஸ்கிரீம் போட்டு காக்ரோச் எப்படி சாப்பிடுது பாருங்க” எனப் பிரதமர் மோடியின் பழைய மாம்பழ பேட்டியை நேரடியாக வம்புக்கு இழுத்து நையாண்டி செய்துள்ளார். பிரதமருக்கு மாம்பழம் மிகவும் பிடித்தமான கனி என்பதால், இளைஞர்களின் இந்த போராட்ட வடிவத்தை மாம்பழ ட்விஸ்ட்டோடு பிரகாஷ் ராஜ் அணுகியிருப்பது நெட்டிசன்களை குஷிப்படுத்தியுள்ளது.
Cockroach eating mangoes.. yummy 😜😜😜#CockroachJantaParty #justasking pic.twitter.com/8oEseWgqtF
— Prakash Raj (@prakashraaj) May 22, 2026
“நம்பிக்கை இருக்கு, என் நாட்டு இளைஞர்கள் கிளர்ந்தெழுந்து தங்களது உரிமைகளை மீட்டெடுப்பார்கள்” என்று இந்த காக்ரோச் ஜனதா பார்ட்டிக்கு ஆரம்பத்திலிருந்தே பிரகாஷ் ராஜ் தனது முழு ஆதரவை வழங்கி வருகிறார். இந்த நையாண்டி இயக்கம் துவக்கப்பட்ட சில நாட்களிலேயே 2 கோடிக்கும் அதிகமான ஃபாலோவர்ஸ்களை அள்ளி ஒட்டுமொத்த அரசியல் சிஸ்டத்தையே அதிர வைத்தது. இதன் காரணமாக, இந்த இயக்கத்தின் அதிகாரப்பூர்வ எக்ஸ் (X) தளம் தற்பொழுது இந்தியாவில் முடக்கப்பட்டுள்ளதாக அதன் நிறுவனர் அபிஜீத் திப்கே (Abhijeet Dipke) அறிவித்திருந்த நிலையில், அதற்கு ஆதரவாகப் பாடகி சின்மயி, வீர் தாஸ் போன்ற பல பிரபலங்களும் தங்களது குரல்களை எழுப்பி வருகின்றனர்.
View this post on Instagram
வழக்கமாகவே மத்திய அரசையும், அதன் திட்டங்களையும் தனது பாணியில் #justasking என்ற ஹாஷ்டேக்குடன் லெஃப்ட் ரைட் வாங்கும் பிரகாஷ் ராஜின் இந்த புதிய வீடியோ தற்பொழுது சோசியல் மீடியாவில் காட்டுத்தீயாய் பரவி வருகிறது. நீட் (NEET) தேர்வு முறைகேடு, இளைஞர்களின் வேலைவாய்ப்புத் திண்டாட்டம் ஆகியவற்றுக்கு எதிராக இந்த ‘CJP’ இயக்கம் உருவாக்கியுள்ள “ஹான் மேன் ஹூன் காக்ரோச்” (ஆமா நான் காக்ரோச் தான்) என்ற பாடல் ட்ரெண்டாகி வரும் வேளையில், பிரகாஷ் ராஜின் இந்த மாம்பழ வீடியோவும் சேர்ந்து கொண்டு தேசிய அளவில் மிகப்பெரிய விவாதப் புயலைக் கிளப்பியுள்ளது.
