தமிழ் சினிமாவில் தற்போது வாரிசு நடிகர்களின் வருகை அதிகரித்துள்ள நிலையில், தனுஷின் மூத்த மகன் யாத்ரா தனுஷ் எப்போது சினிமாவில் அறிமுகமாவார் என்கிற எதிர்பார்ப்பு ரசிகர்களிடையே நீண்ட நாட்களாக இருந்து வருகிறது. சமீபத்தில் நடந்தப் பட விழா ஒன்றில் கலந்துகொண்ட தனுஷிடம், இது குறித்து நேரடியாகக் கேள்வி எழுப்பப்பட்டது.
அதற்குப் பதிலளித்த தனுஷ், “நான் 16 வயதில் சினிமாவுக்கு வந்தது ஒரு சூழலால் நடந்தது. அது திட்டமிட்டு நடந்தது கிடையாது. ஆனால் யாத்ராவிற்கு இப்போது 19 வயது தான் ஆகிறது. அவனைப் பொறுத்தவரை நான் இன்னும் ஒரு குழந்தையாகவே தான் பார்க்கிறேன். அவன் என்னவாகப் போகிறான் என்பதைத் தீர்மானிக்க இது மிகவும் முன்கூட்டிய காலம். அவனுக்கு எது விருப்பமோ அதை அவன் செய்வான்” என்று மிகவும் நிதானமாகப் பதிலளித்தார்.
யாத்ரா ஏற்கனவே சில இசை ஆல்பங்களில் ஆர்வம் காட்டி வருவதாகவும், அவர் கேமராவுக்கு பின்னால் பணியாற்ற விரும்புவதாகவும் சில தகவல்கள் உலா வருகின்றன. இருப்பினும், தனுஷின் இந்தப் பதில், தற்போது தனது மகனைச் சுதந்திரமாக வளர விட வேண்டும் என்கிற ஒரு தந்தையின் எண்ணத்தைப் பிரதிபலிப்பதாக உள்ளது. மேலும், தனுஷ் பேசிய இந்த வீடியோ தற்போது இணையத்தில் வைரலாகி வருகிறது. தனுஷின் ரசிகர்கள் அவரது இந்த எதார்த்தமான அணுகுமுறையைப் பாராட்டி வருகின்றனர்.
சினிமா வாரிசாக இருந்தாலும், தகுந்த வயதும் பக்குவமும் வந்த பிறகு தான் திரைத்துறைக்கு வர வேண்டும் என்பதில் தனுஷ் உறுதியாக இருப்பது தெரிகிறது. இதனால் யாத்ராவின் சினிமா என்ட்ரி குறித்து இப்போதைக்கு எந்தத் திட்டமும் இல்லை என்பது உறுதியாகியுள்ளது.
கிரிஷ். இவர் டிஜிட்டல் செய்தி துறையில் துறையில் 5 ஆண்டுகள் அனுபவம் பெற்றவர். குறிப்பாக தமிழில் முன்னணி பத்திரிக்கைகளின் இணையதள செய்தி பிரிவில் பணியாற்றிய அனுபவம் கொண்டவர். சினிமா, விளையாட்டு சார்ந்த செய்திகள் வழங்குவதில் ஆர்வம் உள்ளவர்.
