தமிழ் திரையுலகில் நீண்ட நாட்களாக விவாதிக்கப்பட்டு வந்த தயாரிப்புச் செலவு மற்றும் நடிகர்களின் சம்பள விவகாரம் இப்போது ஒரு முக்கியமான கட்டத்தை எட்டியுள்ளது. சென்னையில் உள்ள வள்ளுவர் கோட்டத்தில் நடைபெற்ற தமிழ்நாடு திரைப்பட தயாரிப்பாளர் சங்கத்தின் பொதுக்குழு கூட்டத்தில், சினிமாத்துறையை மீட்டெடுக்கப் பல்வேறு அதிரடி தீர்மானங்கள் நிறைவேற்றப்பட்டுள்ளன. இதில் மிக முக்கியமாக, வரும் மே 2-ம் தேதி தமிழகம் முழுவதும் எந்தவொரு திரைப்படப் படப்பிடிப்புகளும் நடைபெறாது எனத் தயாரிப்பாளர் சங்கத் தலைவர் தமிழ் குமரன் அறிவித்துள்ளார்.
இந்த வேலைநிறுத்தத்தின் பின்னணியில் ‘வருவாய் பகிர்வு’ (Revenue Sharing) முறை உள்ளது. இனிவரும் காலங்களில் பெரிய பட்ஜெட் படங்களைத் தயாரிக்கும்போது, முன்னணி நடிகர்கள் மற்றும் கலைஞர்கள் தங்களது சம்பளத்தை நிர்ணயம் செய்யாமல், படத்தின் லாப மற்றும் நஷ்டத்தில் பங்கெடுக்க வேண்டும் எனத் தயாரிப்பாளர்கள் சங்கம் தீர்மானம் நிறைவேற்றியுள்ளது. நடிகர் சங்கம் இதற்கு ஒத்துழைப்பு வழங்கவில்லை என்றால், மே 2-க்குப் பிறகு தொடர் போராட்டங்கள் நடத்தப்படும் என்றும் எச்சரிக்கை விடுக்கப்பட்டுள்ளது. இதன் மூலம் தயாரிப்பாளர்களுக்கு ஏற்படும் நிதி நெருக்கடியைக் குறைக்க முடியும் எனச் சங்கம் நம்புகிறது.
மேலும், OTT வெளியீடு குறித்தும் முக்கிய முடிவுகள் எடுக்கப்பட்டுள்ளன. தியேட்டரில் வெளியான 8 வாரங்கள் கழித்தே படத்தை OTT-யில் வெளியிட வேண்டும் எனத் தயாரிப்பாளர்களை யாரும் நிர்பந்திக்கக் கூடாது எனத் தெரிவிக்கப்பட்டுள்ளது. சிறிய பட்ஜெட் படங்களுக்குத் திரையரங்கு ஒதுக்கீட்டில் முன்னுரிமை அளிக்கவும், முன்னணி நடிகர்கள் இந்தப் புதிய மாற்றத்திற்கு ஒத்துழைக்கவும் வலியுறுத்தப்பட்டுள்ளது. தயாரிப்பாளர் சங்கத்தின் இந்த அதிரடி முடிவு கோலிவுட் வட்டாரத்தில் பெரும் பரபரப்பை ஏற்படுத்தியுள்ளது. நடிகர்கள் மற்றும் முன்னணி கலைஞர்கள் இதற்கு எப்படிப் பதிலளிக்கப் போகிறார்கள் என்பதைப் பொறுத்தே தமிழ் சினிமாவின் அடுத்தகட்ட நகர்வு அமையும்.
