பாலிவுட் திரையுலகில் பெரும் எதிர்பார்ப்பை ஏற்படுத்தியுள்ள நடிகர் ரன்வீர் சிங்கின் ‘துரந்தர்: தி ரிவெஞ்ச்’ (Dhurandhar: The Revenge) திரைப்படத்தின் அதிகாரப்பூர்வ ட்ரைலர் தற்போது வெளியிடப்பட்டுள்ளது. இயக்குனர் ஆதித்யா தர் இயக்கத்தில் உருவாகியுள்ள இத்திரைப்படம், கடந்த 2025-ம் ஆண்டு வெளியாகி வசூல் சாதனை படைத்த ‘துரந்தர்’ படத்தின் இரண்டாம் பாகமாகும். ரன்வீர் சிங் ஒரு உளவுத்துறை அதிகாரியாகவும், லியாரி (Lyari) பகுதியின் தலைவனாகவும் மிரட்டலான தோற்றத்தில் நடித்துள்ள இந்த ட்ரைலர், இணையதளங்களில் வெளியாகி தற்போது காட்டுத்தீயாகப் பரவி வருகிறது.
ஜியோ ஸ்டுடியோஸ் (Jio Studios) மற்றும் பி62 ஸ்டுடியோஸ் (B62 Studios) தயாரித்துள்ள இத்திரைப்படம், வரும் மார்ச் 19, 2026 அன்று உலகம் முழுவதும் உள்ள திரையரங்குகளில் பிரம்மாண்டமாக வெளியாக உள்ளது. தமிழ், தெலுங்கு, மலையாளம் மற்றும் கன்னடம் ஆகிய தென்னிந்திய மொழிகளிலும் இப்படம் ஒரே நேரத்தில் வெளியாக இருப்பது குறிப்பிடத்தக்கது. இந்த இரண்டாம் பாகத்தில் ரன்வீர் சிங்குடன் இணைந்து சஞ்சய் தத், அர்ஜுன் ராம்பால், ஆர். மாதவன், அக்ஷய் கண்ணா மற்றும் சாரா அர்ஜுன் ஆகியோர் முக்கிய கதாபாத்திரங்களில் நடித்துள்ளனர்.
ட்ரைலரின் படி, முதல் பாகத்தின் தொடர்ச்சியாக ஜஸ்கிரத் சிங் ரங்கி (Jaskirat Singh Rangi) எப்படி ஹம்சா அலி மசாரி (Hamza Ali Mazari) என்ற அடையாளத்துடன் பாகிஸ்தானுக்குள் ஊடுருவி உளவு பார்க்கிறார் என்பதையும், அங்கு அவர் சந்திக்கும் சவால்களையும் அதிரடி ஆக்க்ஷன் காட்சிகளுடன் விவரிக்கிறது. குறிப்பாக சஞ்சய் தத் ஒரு அதிரடி காவல்துறை அதிகாரியாகவும், மாதவன் உளவுத்துறை இயக்குனராகவும் நடித்துள்ளனர். அர்ஜுன் ராம்பால் இப்படத்தின் பிரதான வில்லனாகக் களம் இறங்கியுள்ளார்.
தொழில்நுட்ப ரீதியாக ஆதித்யா தர் இப்படத்தை மிகவும் பிரம்மாண்டமாகச் செதுக்கியுள்ளார். இப்படத்திற்கு சாஸ்வத் சச்தேவ் (Shashwat Sachdev) இசையமைத்துள்ளார். முதல் பாகம் சுமார் 1,300 கோடி ரூபாய்க்கு மேல் வசூல் செய்து சாதனை படைத்த நிலையில், இந்த இரண்டாம் பாகம் அதையும் மிஞ்சும் வகையில் இருக்கும் எனத் திரைத்துறை வட்டாரங்கள் தெரிவிக்கின்றன. மேலும், ஹிந்தி மற்றும் தென்னிந்திய மொழிகளிலும் ட்ரைலர் வெளியிடப்பட்டுள்ளது.
இத்திரைப்படம் குடி பத்வா (Gudi Padwa), உகாதி (Ugadi) மற்றும் ஈத் பண்டிகையை முன்னிட்டு வெளியாகிறது. படத்தின் நீளம் சுமார் 3 மணி நேரம் 55 நிமிடங்கள் இருக்கலாம் எனத் தகவல்கள் கசிந்துள்ள நிலையில், இது ரசிகர்களுக்கு ஒரு முழுமையான சினிமா விருந்தாக அமையும் என்பதில் சந்தேகமில்லை. படத்தின் முன்பதிவுகள் விரைவில் தொடங்கப்பட உள்ளன. இப்படத்தின் ரிலீஸ் தேதி ஏற்கனவே உறுதி செய்யப்பட்டுவிட்டதால், ரன்வீர் சிங் ரசிகர்கள் மிகுந்த உற்சாகத்தில் உள்ளனர்.
ஸ்ரீ. இவர் டிஜிட்டல் செய்தி துறையில் துறையில் 8 ஆண்டுகள் அனுபவம் பெற்றவர். குறிப்பாக தமிழில் முன்னணி பத்திரிக்கைகளின் இணையதள் செய்தி பிரிவில் ஆசிரியராக பணியாற்றிய அனுபவம் கொண்டவர். சினிமா, அரசியல் சார்ந்த செய்திகள் வழங்குவதில் ஆர்வம் உள்ளவர்.
