இயக்குநர் நிதீஷ் சகாதேவ் இயக்கத்தில் நடிகர் ஜீவா நடிப்பில் வெளியான ‘தலைவர் தம்பி தலைமையில்’ (TTT) திரைப்படத்தின் இந்தி ரீமேக் உரிமையை பிரபல தயாரிப்பாளர் போனி கபூர் அதிகாரப்பூர்வமாகக் கைப்பற்றியுள்ளார். பொங்கல் பண்டிகையை முன்னிட்டு கடந்த ஜனவரி 15 அன்று வெளியான இத்திரைப்படம், விமர்சன ரீதியாகவும் வசூல் ரீதியாகவும் பெரும் வெற்றி பெற்ற நிலையில், அதன் கதைக்களத்தால் ஈர்க்கப்பட்ட போனி கபூர், வட இந்திய மொழிகளுக்கான உரிமையைப் பெற்றுள்ளார்.
கடந்த ஜனவரி மாதம் பொங்கல் வெளியீடாக வந்த ‘தலைவர் தம்பி தலைமையில்’ திரைப்படம், நடிகர் ஜீவாவின் திரைப்பயணத்தில் ஒரு முக்கியமான மறுபிரவேசமாக அமைந்தது. ஒரு சிறிய கிராமத்தில் ஒரே நாளில் நடைபெறும் திருமணம் மற்றும் இறுதிச்சடங்கு ஆகியவற்றால் ஏற்படும் மோதல்களை நகைச்சுவை ததும்பப் பேசிய இப்படம், சுமார் 40 கோடி ரூபாய்க்கும் மேல் வசூலித்து சாதனை படைத்தது. கண்ணன் ரவி தயாரிப்பில் விஷ்ணு விஜய் இசையில் உருவான இப்படத்தில் தம்பி ராமையா, இளவரசு மற்றும் பிரார்த்தனா நாதன் ஆகியோர் முக்கியக் கதாபாத்திரங்களில் நடித்திருந்தனர்.
சமீபத்தில் கோயம்புத்தூரில் நடைபெற்ற நட்சத்திர கிரிக்கெட் போட்டியின் போது (CCL), ஒரு திரையரங்கில் இத்திரைப்படத்தைப் பார்த்த போனி கபூர், அதன் எளிய மற்றும் வலுவான திரைக்கதையால் ஈர்க்கப்பட்டுள்ளார். இதையடுத்து சென்னை வெற்றிக் கொண்டாட்டத்தின் போது அவர் இப்படத்தின் ரீமேக் உரிமையை உறுதி செய்துள்ளார். பாலிவுட்டின் முன்னணி நட்சத்திரங்களை வைத்து இப்படத்தை இந்தியில் பிரம்மாண்டமாக உருவாக்க அவர் திட்டமிட்டுள்ளார். இதற்கிடையில், இப்படத்தின் டிஜிட்டல் உரிமையை நெட்ஃபிளிக்ஸ் தளம் பெற்றுள்ளதும், பிப்ரவரி 12 முதல் ஒளிபரப்பாக இருப்பதும் குறிப்பிடத்தக்கது.
