தமிழ் திரையுலகில் வசூல் மற்றும் விமர்சன ரீதியாக மாபெரும் சாதனையைப் படைத்த நடிகர் விஜய் சேதுபதியின் (Vijay Sethupathi) 50-வது படமான ‘மகாராஜா’ (Maharaja) திரைப்படம், தற்போது உலகளாவிய அளவில் கவனத்தை ஈர்த்து வருகிறது. நித்திலன் சாமிநாதன் இயக்கத்தில் உருவான இப்படம் பாக்ஸ் ஆபிஸில் மிகப்பெரிய வசூல் சாதனையை நிகழ்த்திய நிலையில், தற்போது இப்படத்தின் ஹாலிவுட் ரீமேக் குறித்த அதிகாரப்பூர்வ தகவல்கள் வெளியாகி இந்திய சினிமா வட்டாரத்தில் பெரும் ஆச்சரியத்தை ஏற்படுத்தியுள்ளன.
இப்படத்தின் தயாரிப்பாளர்களில் ஒருவரான சுதன் அளித்த பேட்டியில், ஹாலிவுட் திரைத்துறையில் இருந்து பிரபல ஏஜென்சி மூலம் ‘மகாராஜா’ படத்தின் ரீமேக் உரிமைகள் பெறப்பட்டுள்ளதாகத் தெரிவித்துள்ளார். மேலும், ஹாலிவுட்டின் முன்னணி ஆஸ்கார் நாயகனான மேத்யூ மெக்கானகி (Matthew McConaughey) இப்படத்தில் விஜய் சேதுபதி நடித்த கதாபாத்திரத்தில் நடிக்க பேச்சுவார்த்தை நடத்தப்பட்டு வருவதாகவும் அவர் உறுதிப்படுத்தியுள்ளார். எனினும், ஏஜென்சி தரப்பிலிருந்தே இறுதி உறுதிப்படுத்தல் வெளியாகும் என்று அவர் குறிப்பிட்டுள்ளார்.
ஏ-லிஸ்ட் (A-list) ஹாலிவுட் நட்சத்திரங்களைக் கொண்டு இப்படத்தை உருவாக்கப் பேச்சுவார்த்தைகள் தீவிரமாக நடைபெற்று வருவதாகவும், அடுத்த ஆண்டு இப்படத்தின் படப்பிடிப்பு தொடங்கும் என எதிர்பார்க்கப்படுவதாகவும் தயாரிப்பாளர் சுதன் கூறியுள்ளார். தமிழ் சினிமாவின் கதைக்களம் ஒன்று உலக அரங்கில் இத்தகைய பிரம்மாண்டமான உயரத்திற்குச் சென்றிருப்பது தமிழ் ரசிகர்களைப் பெருமை கொள்ளச் செய்துள்ளது.
