விஜய் ஜெயலலிதா சந்திப்பு ரகசியம் குறித்த அதிர்ச்சிகரமான தகவலை இயக்குநர் எஸ்.ஏ.சந்திரசேகர் இன்று காலை ஊடகம் ஒன்றிற்கு அளித்த பேட்டியில் பகிர்ந்துள்ளார். தமிழக வெற்றிக் கழகத்தின் (தவெக) தலைவராக மாறியுள்ள நடிகர் விஜய், தற்போது திமுக மற்றும் அதிமுக ஆகிய இரு கட்சிகளையும் ‘தீய சக்தி’ மற்றும் ‘ஊழல் அடிமை கட்சி’ என மிகக் கடுமையாக விமர்சித்து வருகிறார். இதற்குப் பதிலடி கொடுக்கும் விதமாக, “படம் ரிலீஸாக வேண்டும் என்பதற்காக ஜெயலலிதா முன்பு கைகட்டி நின்றவர் தான் இந்த விஜய்” என அதிமுகவினர் விமர்சித்து வரும் நிலையில், அதற்கு முற்றுப்புள்ளி வைக்கும் வகையில் இந்தத் தகவல்கள் வெளியாகியுள்ளன.
போயஸ் தோட்டத்தில் நடந்தது என்ன?
சமீப நாட்களில் விஜய்யின் அரசியல் பேச்சுக்கள் தமிழக அரசியலில் பெரும் விவாதங்களைக் கிளப்பியுள்ளன. “என்னை பார்த்தால் அழுத்தத்திற்கு பயப்படுபவன் போல் இருக்கிறதா?” என்று விஜய் கேட்ட கேள்விக்கு, அதிமுகவினர் பழைய சம்பவங்களைச் சுட்டிக்காட்டி சமூக வலைதளங்களில் பதிவிட்டு வருகின்றனர்.
இந்நிலையில், இன்று எஸ்.ஏ.சந்திரசேகர் வெளியிட்ட தகவலின்படி, மறைந்த முதல்வர் ஜெயலலிதா இவர்களைச் சந்திக்க வருமாறு அழைப்பு விடுத்துள்ளார். “எல்லோரையும் போல் ஜெயலலிதா காலில் விழக்கூடாது என்பதில் நான் உறுதியாக இருந்தேன்” என்று கூறிய எஸ்.ஏ.சி, தன்னுடன் விஜய் மக்கள் இயக்க நிர்வாகிகளையும் அழைத்துச் சென்றதாகத் தெரிவித்தார்.
அதிமுகவிற்கு ஆதரவு கேட்ட ஜெயலலிதா
இந்தச் சந்திப்பின் போது, அதிமுகவிற்கு ஆதரவு அளிக்க வேண்டும் என்று ஜெயலலிதா கோரிக்கை வைத்துள்ளார். அதற்கு எஸ்.ஏ.சந்திரசேகர் ஒப்புக்கொண்டுள்ளார். ஆனால், “உங்கள் மகனை அதிமுகவிற்கு ஆதரவாகப் பேசச் சொல்லுங்கள் அல்லது அவர் பேசும் ஒரு வீடியோவை வெளியிடுங்கள்” என்று ஜெயலலிதா கேட்டபோது, “அவன் இன்னும் சின்ன பையன், அது வேண்டாம்” என்று எஸ்.ஏ.சி மறுத்துவிட்டாராம்.
இந்த மறுப்பு ஜெயலலிதாவிற்கு கடும் கோபத்தை ஏற்படுத்தியதாகவும், அதன் காரணமாகவே விஜய்யின் ‘தலைவா’ திரைப்படம் ரிலீஸாகும்போது திட்டமிட்டுப் பழிவாங்கப்பட்டதாகவும் தற்போது எஸ்.ஏ.சி குற்றம் சாட்டியுள்ளார்.
தலைவா படச் சிக்கலும் அரசியல் பழிவாங்கலும்
தற்போது வெளியாகியுள்ள இந்த விஜய் ஜெயலலிதா சந்திப்பு ரகசியம் மூலம் ‘தலைவா’ படத்தின் ரிலீஸ் தள்ளிப்போனதற்கான பின்னணி வெளிச்சத்திற்கு வந்துள்ளது. அன்று விஜய்யை ஒரு வீடியோ போடச் சொல்லி நிர்ப்பந்தித்ததற்கு அவர் பணியாததே, அவரது படத்திற்கு எதிராக அரசு இயந்திரம் செயல்படக் காரணம் என்று எஸ்.ஏ.சி வாதிடுகிறார்.
நேற்று வரை விஜய்யை ‘கைகட்டி நின்றவர்’ என விமர்சித்தவர்களுக்கு, “நாங்கள் அன்று அடிபணிய மறுத்ததால் தான் பழிவாங்கப்பட்டோம்” என்ற ரீதியில் எஸ்.ஏ.சி-யின் இன்றைய விளக்கம் அமைந்துள்ளது. இது தவெக தொண்டர்கள் மத்தியில் ஒரு புதிய உற்சாகத்தை ஏற்படுத்தியுள்ளது.
