தமிழ் சினிமா உலகத்தில் தற்பொழுது எத்தனையோ நகைச்சுவை நடிகர்கள் வந்து சென்றாலும், பல வருடங்களாக ஒட்டுமொத்த ரசிகர்களின் இதயங்களிலும் நீங்கா இடம் பிடித்து சிம்மாசனம் போட்டு அமர்ந்திருப்பவர் தான் நம்ம வைகைப்புயல் வடிவேலு. இன்று சமூக வலைதளங்களில் வெளியாகும் மீம்ஸ்கள் முதல் மக்களின் அன்றாட வாழ்க்கை வரை வடிவேலுவின் காமெடி வசனங்கள் இல்லாத இடமே இல்லை என்று கூறலாம். இப்போ நகைச்சுவை சக்கரவர்த்தியான வடிவேலு, தான் திரையுலகிற்குள் நுழைந்த ஆரம்பகால கடுமையான போராட்டங்கள் குறித்தும், தனக்கு அடைக்கலம் கொடுத்த உன்னதமான மனிதர் குறித்தும் தற்பொழுது ஒரு புதிய நேர்காணலில் மிகவும் உருக்கமாகப் பேசியுள்ளார்.
அதில் பேசிய அவர், “என்னை யாரும் சினிமாவுக்குள் கையைப் பிடித்து அழைத்து வரவில்லை. நான் கிராமத்தில் இருந்து சென்னைக்கு வந்தபோது போடுவதற்கு வெறும் ஒரு சட்டையைத் தவிர வேறு எதுவுமே என்னிடம் இல்லை. கையில் காசு பணம் இல்லாமல் சாப்பாட்டிற்கே மிகவும் கஷ்டப்பட்டேன்” என்று தனது ஆரம்பகால சோகங்களை நினைவுகூர்ந்தார். மேலும், வெளியில் பல கதைகள் சொல்லப்பட்டு வந்தாலும் தனக்கு சினிமாவில் உண்மையான ஒரு முகவரியையும், கௌரவமான வாழ்க்கையையும் அமைத்துக் கொடுத்தது நடிகர் மற்றும் இயக்குநர் ராஜ்கிரண் தான் என்று வடிவேலு உண்மையை உடைத்துள்ளார்.
சுமார் நான்கு ஆண்டுகள் ராஜ்கிரணின் அலுவலகத்தில் தங்கி வேலை செய்ததாகக் குறிப்பிட்ட வடிவேலு, “அவர் எனக்கு சினிமாவில் நடிக்கும் வாய்ப்புகளை மட்டும் தரவில்லை. பசியோடு இருந்த எனக்கு தினமும் சோறு போட்டு ஒரு நல்ல வாழ்க்கையை உருவாக்கிக் கொள்ளப் பெரிய அளவில் உதவினார். வெளியில் இருந்து அடுத்தடுத்து வாய்ப்புகள் வந்தபோது என்னை வாழ்த்தி, ஆசி வழங்கி அனுப்பி வைத்தார்” என்று நெகிழ்ந்துள்ளார். தனக்கு சாப்பாடு போட்டு வாழ்வளித்த ராஜ்கிரணின் அந்த நல்ல உள்ளத்திற்குத் தான் என்றும் கடமைப்பட்டிருப்பதாக வைகைப்புயல் வடிவேலு தெரிவித்துள்ள இந்த உருக்கமான செய்தி தற்பொழுது ஒட்டுமொத்த சமூக வலைதளங்களிலும் செம வைரலாகப் பரவி வருகிறது.
ஸ்ரீ. இவர் டிஜிட்டல் செய்தி துறையில் துறையில் 8 ஆண்டுகள் அனுபவம் பெற்றவர். குறிப்பாக தமிழில் முன்னணி பத்திரிக்கைகளின் இணையதள் செய்தி பிரிவில் ஆசிரியராக பணியாற்றிய அனுபவம் கொண்டவர். சினிமா, அரசியல் சார்ந்த செய்திகள் வழங்குவதில் ஆர்வம் உள்ளவர்.
