தமிழ் சினிமாவில் எப்போதுமே, சினிமாவுக்கும் அரசியலுக்கும் ஒரு பிரிக்க முடியாத பந்தம் உண்டு. எம்ஜிஆர் காலம் தொடங்கி இப்போது விஜய் வரை பல நடிகர்கள் சினிமாவில் இருந்து அரசியலுக்கு வந்துள்ளனர். இதே கருவை மையமாக வைத்து, தற்போதைய அரசியல் சூழலை நக்கலாகவும், நயமாகவும் சொல்லும் படமாக உருவாகியுள்ளது ‘டிஎன் 2026’ (TN 2026). நட்டி நட்ராஜ் ஹீரோவாக நடித்துள்ள இந்தப் படத்தின் டீசர் நேற்று (ஏப்ரல் 2) வெளியாகி, தற்போது சோசியல் மீடியாவில் தாறுமாறாக ட்ரெண்ட் ஆகி வருகிறது.
டீசரின் ஹைலைட்டே அந்த மேட்டர் தான்… படத்தில் நட்டி ‘தங்க நட்சத்திரம்’ குல்காந்த் குமார் என்ற கேரக்டரில் நடித்துள்ளார். பாக்ஸ் ஆபீஸில் நம்பர் ஒன் ஹீரோவாக இருக்கும் அவர், திடீரென தனது ரசிகர் மன்றங்களை மக்கள் நல இயக்கமாக மாற்றி அரசியலில் குதிக்கிறார். “நடிகன் ஊழலை எதிர்க்கலாமா? நடிகனுக்கு அரசியல் தெரியுமா?” என மற்ற அரசியல்வாதிகள் கேட்கும் கேள்விகளுக்கு, நட்டியின் ஆதரவாளர்கள் டீசரில் கொடுக்கும் பதில்கள் அப்படியே நிஜக்கால அரசியல் சூழலை பிரதிபலிக்கிறது. குறிப்பாக ரெடின் கிங்ஸ்லி கேட்கும் அந்த நக்கல் கேள்விகள் ரசிகர்களிடையே செம சிரிப்பலைகளை உருவாக்கியுள்ளது.
உமாபதி ராமையா இயக்கத்தில் உருவாகியுள்ள இந்தப் படத்திற்கு தேசிய விருது பெற்ற தம்பி ராமையா கதை எழுதியுள்ளார். சினிமாவில் மாஸ் காட்டும் ஒரு ஹீரோ, நிஜ அரசியலில் எப்படி மல்லுக்கட்டுகிறார் என்பதே படத்தின் ஒன்லைன். தர்புகா சிவாவின் மியூசிக் டீசருக்கு இன்னும் ஒரு மாஸ் பீலை கொடுத்துள்ளது. எம்.எஸ். பாஸ்கர், இளவரசு என ஒரு பெரிய நட்சத்திர பட்டாளமே படத்தில் இருப்பதால், காமெடிக்கும் மெசேஜுக்கும் பஞ்சமே இருக்காது எனத் தெரிகிறது.
ரசிகர்கள் மத்தியில் பெரிய எதிர்பார்ப்பு என்னவென்றால்… வரும் ஏப்ரல் 23-ம் தேதி தமிழக சட்டமன்ற தேர்தல் நடைபெற உள்ள நிலையில், அதற்கு முன்பாக ஏப்ரல் 10-ம் தேதியே இந்தப் படம் ரிலீஸாகிறது. படத்தில் வரும் பல வசனங்கள் தற்போது அரசியலில் இருக்கும் முன்னணி நட்சத்திரங்களைச் சீண்டுவது போல் இருப்பதால், தியேட்டர்களில் விசில் சத்தம் பறக்கும் என எதிர்பார்க்கப்படுகிறது. “யார் மனதையும் புண்படுத்தும் நோக்கமல்ல” என்று படக்குழு டிஸ்கிளைமர் போட்டாலும், டீசரைப் பார்த்த நெட்டிசன்கள் பலரும் இது யாரைச் சொல்கிறது என்று கமெண்ட் செக்ஷனில் விவாதித்து வருகின்றனர்.
மொத்தத்தில் ‘டிஎன் 2026’ டீசர், கோலிவுட் டூ கோட்டை பயணத்தை செம ஜாலியாகவும் சீரியஸாகவும் காட்டியுள்ளது. தேர்தல் நேரத்தில் வெளியாவதால், இந்தப் படம் பாக்ஸ் ஆபீஸில் ஒரு பெரிய மாற்றத்தை உருவாக்குமா என்பதைப் பொறுத்திருந்து தான் பார்க்க வேண்டும்.
