திரைப்படங்கள் தியேட்டர்களில் சரியாக ஓடாததற்குக் டிக்கெட் விலையை தயாரிப்பாளர்கள் உயர்த்துவது தான் காரணம் எனத் தியேட்டர் உரிமையாளர்கள் தரப்பில் தொடர்ந்து குற்றச்சாட்டுகள் வைக்கப்பட்டு வருகின்றன. இந்நிலையில், முன்னணித் தயாரிப்பாளர் நாக வம்சி (Naga Vamsi) இதற்கு மிகவும் காட்டமான மற்றும் எதார்த்தமான ஒரு பதிலடியைக் கொடுத்துள்ளார். இது தற்போது சமூக வலைதளங்களில் சினிமா ரசிகர்களிடையே பெரும் ஆதரவைப் பெற்று வருகிறது.
டிக்கெட் உயர்வு ஒரு பிரச்சனையே இல்லை
நாக வம்சி தனது கருத்தில், “டிக்கெட் விலையை 50 ரூபாய் முதல் 100 ரூபாய் வரை உயர்த்துவதால் மட்டுமே ரசிகர்கள் தியேட்டர்களுக்கு வருவதைத் தவிர்ப்பதில்லை” என்று திட்டவட்டமாகக் கூறியுள்ளார். ஒரு நல்ல படத்தைப் பார்க்க ரசிகர்கள் அந்தத் தொகையைச் செலவு செய்யத் தயாராகவே இருக்கிறார்கள் என்பது அவரது வாதம். ஆனால், தியேட்டருக்குள் நுழைந்த பிறகு அவர்கள் சந்திக்கும் மற்ற செலவுகள் தான் அவர்களை முகம் சுளிக்க வைக்கிறது என்று அவர் சுட்டிக்காட்டியுள்ளார்.
பாப்கார்ன் மற்றும் ஆன்லைன் கட்டணங்களே வில்லன்
தியேட்டர்களில் விற்கப்படும் பாப்கார்ன் மற்றும் கூல் டிரிங்ஸ் (Popcorn and Cool Drinks) ஆகியவற்றின் விலை மிகவும் அதிகமாக இருப்பதே மக்கள் தியேட்டருக்கு வராமல் இருப்பதற்குக் முக்கிய காரணம் என அவர் குற்றம் சாட்டியுள்ளார். மேலும், ஆன்லைனில் டிக்கெட் முன்பதிவு செய்யும் போது வசூலிக்கப்படும் BookMyShow வசதிக்கான கட்டணங்களும் (Convenience fees) ரசிகர்களுக்குப் கூடுதல் சுமையாக இருக்கிறது. “இவற்றை முதலில் குறைப்பதற்கு முயற்சி செய்யுங்கள், அதன் பிறகு டிக்கெட் விலையைப் பற்றிப் பேசலாம்” எனத் தியேட்டர் உரிமையாளர்களுக்கு அவர் அறிவுரை வழங்கியுள்ளார்.
இந்த விஷயம் தற்போது சினிமா வட்டாரத்தில் விவாதப் பொருளாக மாறியுள்ளது. பெரும்பாலான ரசிகர்கள் நாக வம்சியின் கருத்திற்கு ஆதரவு தெரிவித்து வருகின்றனர். தியேட்டர் கேன்டீன்களில் விற்கப்படும் உணவுப் பொருட்களின் விலையைக் கட்டுப்படுத்தினால் மட்டுமே நடுத்தரக் குடும்பங்கள் மீண்டும் தியேட்டர்களை நோக்கி வரும் என்பது நிதர்சனமான உண்மையாக உள்ளது.
