ஒப்போ நிறுவனம் தனது புதிய K14x 5G ஸ்மார்ட்போனை இந்தியச் சந்தையில் இன்று பிப்ரவரி 10 அன்று அறிமுகப்படுத்தியுள்ளது. ஒப்போ K14x 5G ஸ்மார்ட்போன் 6500mAh திறன் கொண்ட பிரம்மாண்ட பேட்டரி மற்றும் 120Hz புதுப்பிப்பு வீதத்துடன் கூடிய டிஸ்ப்ளே போன்ற சிறப்பம்சங்களுடன் பட்ஜெட் விலைப் பிரிவில் வெளியிடப்பட்டுள்ளதால், இது நடுத்தர வர்க்க வாடிக்கையாளர்கள் மற்றும் மாணவர்களிடையே தற்போதே பெரும் எதிர்பார்ப்பை ஏற்படுத்தியுள்ளது.
இந்த ஸ்மார்ட்போன் மீடியாடெக் டைமென்சிட்டி 6300 சிப்செட் மூலம் இயக்கப்படுகிறது. இதன் 6.75 இன்ச் HD+ டிஸ்ப்ளே 1125 நிட்ஸ் வரையிலான உச்ச பிரகாசத்தை (Peak Brightness) வழங்கும் திறன் கொண்டது. புகைப்படங்களுக்காக 50 மெகாபிக்சல் முதன்மை கேமரா மற்றும் 2 மெகாபிக்சல் டெப்த் சென்சார் கொண்ட இரட்டை கேமரா அமைப்பு பின்புறம் வழங்கப்பட்டுள்ளது. செல்ஃபி மற்றும் வீடியோ அழைப்புகளுக்கு 8 மெகாபிக்சல் முன்பக்க கேமரா உள்ளது. ஆண்ட்ராய்டு 15 அடிப்படையிலான கலர் ஓஎஸ் 15 மென்பொருளில் இந்தச் சாதனம் இயங்குகிறது.
View this post on Instagram
பேட்டரி செயல்திறனை மையமாகக் கொண்டு உருவாக்கப்பட்டுள்ள இதில் 45W வேகமான சார்ஜிங் வசதி உள்ளது; இதற்கான சார்ஜர் பெட்டியிலேயே வழங்கப்படுகிறது. தூசி மற்றும் நீர் தெறிப்பிலிருந்து பாதுகாக்க ஐபி64 தரச் சான்றிதழ் (IP64 Rating) வழங்கப்பட்டுள்ளது. 4ஜிபி ரேம் மற்றும் 128ஜிபி சேமிப்பு கொண்ட அடிப்படை மாடல் 14,999 ரூபாய்க்கும், 6ஜிபி ரேம் கொண்ட மாடல் 16,999 ரூபாய்க்கும் விற்பனை செய்யப்பட உள்ளன. ஐசி ப்ளூ மற்றும் பிரிசம் வயலட் நிறங்களில் கிடைக்கும் இந்த போன் வரும் பிப்ரவரி 16 முதல் பிளிப்கார்ட் மற்றும் ஒப்போ இ-ஸ்டோரில் விற்பனைக்கு வருகிறது.
