தமிழ் திரையுலகில் இசையமைப்பாளராகவும் நடிகராகவும் கோடிக்கணக்கான ரசிகர்களின் உள்ளங்களைக் கவர்ந்த ஹிப்ஹாப் தமிழா (Hiphop Tamizha) நடிப்பில் உருவான மாபெரும் வெற்றிப் படத்தின் இரண்டாம் பாகமான ‘மீசைய முறுக்கு 2’ (Meesaya Murukku 2) இன்று உலகம் முழுவதும் திரையரங்குகளில் வெளியாகியுள்ளது. முதல் பாகம் தந்த அதே உத்வேகத்தையும் உற்சாகத்தையும் ரசிகர்கள் எதிர்பார்த்திருந்த நிலையில், இப்படம் குறித்த தியேட்டர் அனுபவங்கள் மற்றும் விமர்சனங்கள் தற்போது வெளியாகியுள்ளன. முதல் பாகத்திற்கும் இதற்கும் நேரடியான கதைத் தொடர்பு இல்லாவிட்டாலும், இசையை மையமாகக் கொண்டு முற்றிலும் மாறுபட்ட மூன்று வெவ்வேறு காலகட்டங்களைச் சொல்லும் ஒரு புதிய பயணமாக இப்படம் களமிறங்கியுள்ளது.
படத்தின் தொடக்கம் கானா இசையுடனும், மூன்று வெவ்வேறு தோற்றங்களில் ஹிப்ஹாப் ஆதியின் அறிமுகத்துடனும் தொடங்குகிறது. முதல் பாதியைப் பொறுத்தவரை, முழுக்க முழுக்க இளைஞர்களைக் குறிவைக்கும் வகையில் பல வேடிக்கையான தருணங்கள் மற்றும் மசாலா அம்சங்கள் இடம்பெற்றுள்ளன.
குறிப்பாக, ஹர்ஷத் கான் (Harshath Khan) ஒன்-லைனர்கள் சில இடங்களில் நன்றாக ஒர்க்கவுட் ஆகியிருந்தாலும், திரைக்கதையில் பெரிய அளவிலான மோதல்கள் (Conflicts) இல்லாததால் சில இடங்களில் தொய்வு ஏற்படுவதாக ரசிகர்கள் கருத்து தெரிவித்துள்ளனர். எனினும், இடைவேளைக் காட்சி மற்றும் தியேட்டர்களில் அனிருத் இசையைப் போல ஒலிக்கும் பாடல்கள் மற்றும் பின்னணி இசை பார்வையாளர்களை இருக்கையின் நுனியில் அமர வைக்கிறது. சில காட்சிகளில் கிரிஞ்ச் தருக்ககள் இருப்பதாக விமர்சனங்கள் எழுந்தாலும், ஹிப்ஹாப் ஆதியின் எஃப்பர்ட்லெஸ் நடிப்பு படத்திற்குப் பலம் சேர்த்துள்ளது.
இரண்டாம் பாதிக்குப் பிறகு படம் முழுமையான வடிவம் பெற்று மிகச் சிறப்பாக நகர்கிறது. முதல் பாதியின் மெதுவான நகர்வுகளை மாற்றி, இரண்டாம் பாடியில் கானா இசையை எவ்வாறு உலகத்திற்குக் கொண்டு செல்கிறார்கள் என்பதை சுவாரஸ்யமாக விளக்கியுள்ளனர். குறிப்பாக, இறுதி 45 நிமிடங்கள் திரையரங்குகளில் விசில் பறக்கும் தருணங்களாகவும், கண்களைக் கவரும் உத்வேகமான காட்சிகளாகவும் அமைந்துள்ளன. வாரிசு அரசியலை எதிர்க்கும் விதமாகவும், சொந்த முயற்சியில் தங்களது திறமையால் முன்னேறும் உண்மையான கலைஞர்களை ஆதரிக்க வேண்டும் என்ற வலுவான செய்தியையும் இப்படம் ஆழமாகப் பதிவு செய்துள்ளது. கதிகா சர்மா (Ketika Sharma) மற்றும் ரம்யா ரங்கநாதன் (Ramya Ranganathan) தங்களுக்குக் கொடுக்கப்பட்ட கதாபாத்திரங்களைச் சரியாகச் செய்துள்ளனர். முதல் பாகத்தில் வந்த ஒரு முக்கிய கதாப்பாத்திரத்தின் கேமியோ என்ட்ரி ரசிகர்களை உற்சாகக் கடலில் ஆழ்த்தியுள்ளது.
ஒட்டுமொத்தமாகப் பார்க்கும்போது, ‘மீசைய முறுக்கு 2’ முதல் பாதியில் சில இடங்களில் தொய்வையும் கிரிஞ்ச் தருணங்களையும் கொண்டிருந்தாலும், இரண்டாம் பாதியின் எமோஷனல் மற்றும் மோட்டிவேஷனல் காட்சிகள் மூலம் ரசிகர்களை முழுமையாகக் கவர்ந்துள்ளது. பாக்ஸ் ஆபிஸ் வசூலைத் தாண்டி, குடும்பங்கள் மற்றும் GenZ இளைஞர்களைக் கவரும் வகையில் அமைந்துள்ள இந்த ஜாலி எண்டர்டெயினர், தமிழ் சினிமாவில் மீண்டும் ஒருமுறை ஹிப்ஹாப் தமிழாவின் ஸ்டைலான வெற்றியைப் பதிவு செய்துள்ளது.
