தமிழக அரசியலில் ஒரு புதிய சகாப்தம் தொடங்கியுள்ள நிலையில், அதன் தாக்கம் தற்போது இணையதளங்களிலும் பலமாக எதிரொலிக்கத் தொடங்கியுள்ளது. நடிகர் விஜய் (Vijay) தமிழக முதலமைச்சராகப் பொறுப்பேற்ற பிறகு, தமிழக முதலமைச்சர் அலுவலகத்தின் (CMO Tamil Nadu) அதிகாரப்பூர்வ சமூக வலைதளப் பக்கங்கள் இதுவரை கண்டிராத ஒரு மாபெரும் வளர்ச்சியை எட்டியுள்ளன. சினிமாவில் அவருக்கு இருந்த அதே செல்வாக்கு இப்போது அரசியலிலும் அவரது டிஜிட்டல் பக்கங்களுக்குப் புதிய பலத்தைக் கொடுத்துள்ளது.
மிரள வைக்கும் ஃபாலோயர்களின் எண்ணிக்கை
கடந்த காலங்களில் ‘CMO Tamil Nadu’ இன்ஸ்டாகிராம் பக்கத்தில் சுமார் 4 லட்சம் ஃபாலோயர்கள் மட்டுமே இருந்தனர். ஆனால், விஜய் முதலமைச்சராகப் பொறுப்பேற்ற சில தினங்களிலேயே அந்த எண்ணிக்கை 16 லட்சமாக உயர்ந்துள்ளது. அதேபோல், எக்ஸ் (X) தளத்தில் 4 லட்சமாக இருந்த ஃபாலோயர்களின் எண்ணிக்கை தற்போது 21 லட்சத்தைக் கடந்து சாதனை படைத்துள்ளது.
குறிப்பாக, விஜய் முதலமைச்சர் நாற்காலியில் அமர்ந்திருக்கும் புகைப்படத்தை டிபியாக (DP) மாற்றிய 24 மணி நேரத்திற்குள், அதனை 14 லட்சம் பேர் பார்வையிட்டுள்ளது குறிப்பிடத்தக்கது. இது விஜய்க்கு இருக்கும் மக்கள் செல்வாக்கை டிஜிட்டல் முறையிலும் உறுதிப்படுத்தியுள்ளது.
அரசு முறை அப்டேட்கள் மற்றும் நாகரிக அரசியல்
இந்தச் சமூக வலைதளப் பக்கங்களில் முதலமைச்சரின் தினசரிப் பணிகள், மக்கள் நலத்திட்டங்கள், பல்வேறு தலைவர்களுடனான சந்திப்புகள் மற்றும் அரசு விழாக்கள் குறித்த தகவல்கள் உடனுக்குடன் பகிரப்பட்டு வருகின்றன. குறிப்பாக, தமிழக சட்டப்பேரவையில் எம்.எல்.ஏ-வாகப் பதவிப் பிரமாணம் எடுத்துக் கொண்ட புகைப்படங்கள் மற்றும் முன்னாள் முதலமைச்சர் எம்.கே. ஸ்டாலின் (M.K. Stalin) உள்ளிட்ட மூத்த தலைவர்களை மரியாதை நிமித்தமாகச் சந்தித்த புகைப்படங்களை விஜய் பகிர்ந்துள்ளார்.
மாற்றுக்கருத்து கொண்ட தலைவர்களையும் மதிக்கும் அவரது இந்த நாகரிக அரசியல் போக்கு, சமூக வலைதளங்களில் இளைஞர்களிடையே பெரும் வரவேற்பைப் பெற்றுள்ளது. அரசு நிர்வாகம் தொடர்பான தகவல்களை மக்கள் எளிதில் தெரிந்துகொள்ள இந்த டிஜிட்டல் தளங்கள் ஒரு முக்கியப் பாலமாகத் தற்போது மாறியுள்ளன.
