இந்தியத் திரையுலகின் பிளாக்பஸ்டர் இயக்குனர் அட்லீ, ‘ஜவான்’ படத்தின் இமாலய வெற்றிக்குப் பிறகு தனது அடுத்த பிரம்மாண்ட படைப்பிற்குத் தயாராகிவிட்டார். ‘AA22xA6’ என்று அதிகாரப்பூர்வமாக அழைக்கப்படும் இப்புதிய திரைப்படத்தில், தெலுங்குத் திரையுலகின் சூப்பர் ஸ்டார் அல்லு அர்ஜுன் கதாநாயகனாக நடிக்கிறார். இப்படத்தின் படப்பிடிப்பு மற்றும் தொழில்நுட்பப் பணிகள் தற்போது மும்பையில் உள்ள அதிநவீன விஎஃப்எக்ஸ் ஸ்டுடியோவில் ரகசியமாக நடைபெற்று வருகின்றன. இந்நிலையில், சமூக வலைதளத்தில் அட்லீ பகிர்ந்துள்ள “யாரும் உங்களைப் போல இருக்க முடியாது, அதுவே உங்கள் பலம்” என்ற வரிகள் ரசிகர்களிடையே பெரும் வைரலாகி வருகிறது.
சன் பிக்சர்ஸ் நிறுவனம் தயாரிக்கும் இப்படம் அல்லு அர்ஜுனின் 22-வது படமாகவும், அட்லீயின் 6-வது படமாகவும் உருவாகிறது. இது ஒரு அறிவியல் புனைகதை (Sci-Fi) கலந்த ஆக்ஷன் திரில்லர் படமாக உருவாகி வருகிறது. இப்படத்தின் மிக முக்கியமான அறிவிப்பு வரும் ஏப்ரல் 8, 2026 அன்று அல்லு அர்ஜுனின் பிறந்தநாளை முன்னிட்டு வெளியாக உள்ளது. அன்றைய தினம் படத்தின் அதிகாரப்பூர்வ தலைப்பு மற்றும் ஒரு பிரம்மாண்டமான டீசர் வீடியோவை வெளியிடப் படக்குழு திட்டமிட்டுள்ளது. இந்த வீடியோவில் அல்லு அர்ஜுன் இதுவரை பார்த்திராத ஒரு மாறுபட்ட தோற்றத்தில் தோன்றுவார் என்று கூறப்படுகிறது.
View this post on Instagram
இப்படத்தில் அல்லு அர்ஜுனுக்கு ஜோடியாக பாலிவுட் நட்சத்திரம் தீபிகா படுகோன் நடிக்கிறார். இவர்களுடன் மற்றுமொரு சர்ப்ரைஸாக பாலிவுட் நடிகை அனுஷ்கா சர்மா இப்படத்தில் ஒரு முக்கிய கதாபாத்திரத்தில் நடிக்க பேச்சுவார்த்தை நடைபெற்று வருவதாகத் தகவல்கள் வெளியாகியுள்ளன. இது உறுதியாகும் பட்சத்தில், அனுஷ்கா சர்மா நடிக்கும் முதல் நேரடி தெலுங்குத் திரைப்படம் இதுவாக இருக்கும். இவர்களுடன் நடிகைகள் மிருணால் தாக்கூர், ராஷ்மிகா மந்தனா மற்றும் ஜான்வி கபூர் ஆகியோரும் முக்கிய கதாபாத்திரங்களில் நடிக்கவுள்ளனர். இப்படத்திற்கு சாய் அபியங்கர் இசையமைக்கிறார்.
படம் குறித்துப் பேசிய அட்லீ, “நாங்கள் ஒவ்வொரு நாளும் ஒரு புதிய உலகத்தைக் கண்டறிந்து வருகிறோம். நீங்கள் அனைவரும் அப்டேட் கேட்கிறீர்கள், உங்களை விட அந்த அறிவிப்பைக் கொடுக்க நான் அதிக ஆவலாக உள்ளேன்” என்று தெரிவித்துள்ளார். சுமார் 800 கோடி ரூபாய் பட்ஜெட்டில் ஹாலிவுட் தரத்திலான விஎஃப்எக்ஸ் தொழில்நுட்பத்தைப் பயன்படுத்தி இப்படம் உருவாகி வருகிறது. அல்லு அர்ஜுன் இப்படத்தில் நான்கு வித்தியாசமான தோற்றங்களில் நடிக்கவுள்ளதாகக் கூறப்படுகிறது.
அட்லீ மற்றும் அல்லு அர்ஜுன் ஆகிய இருவருமே பான்-இந்தியா அளவில் மிகப்பெரிய மார்க்கெட்டை வைத்திருப்பவர்கள் என்பதால், இப்படம் இந்திய சினிமாவில் புதிய வசூல் சாதனைகளை முறியடிக்கும் என்று கணிக்கப்படுகிறது. 2027-ம் ஆண்டு திரையரங்குகளில் வெளியாகத் திட்டமிடப்பட்டுள்ள இப்படத்தின் தலைப்பு அறிவிப்புக்காக ஒட்டுமொத்த இந்தியத் திரையுலகமே காத்திருக்கிறது. அட்லீயின் இந்த புதிய பதிவு, அல்லு அர்ஜுனின் தனித்துவமான ஸ்டைலை மையப்படுத்தியே அமைக்கப்பட்டுள்ளதாக அவரது ரசிகர்கள் கொண்டாடி வருகின்றனர்.
