ஐகான் ஸ்டார் அல்லு அர்ஜுன் மற்றும் இயக்குநர் லோகேஷ் கனகராஜ் கூட்டணியில் உருவாகவுள்ள ஏஏ23 தீம் மியூசிக் (AA23 Theme) சமூக வலைதளமான இன்ஸ்டாகிராமில் 6 லட்சம் ரீல்ஸ்களைக் கடந்து புதிய சாதனையைப் படைத்துள்ளது. பொங்கல் பண்டிகையை முன்னிட்டு வெளியான இப்படத்தின் அறிவிப்பு வீடியோவில் இடம்பெற்ற அனிருத்தின் பின்னணி இசை, குறுகிய காலத்திலேயே அதிக ரீல்ஸ்கள் செய்யப்பட்ட ஒரு திரைப்பட அறிவிப்பு தீம் என்ற பெருமையைப் பெற்றுள்ளது.
தெலுங்குத் திரையுலகின் ஐகான் ஸ்டார் அல்லு அர்ஜுன் மற்றும் பிளாக்பஸ்டர் இயக்குநர் லோகேஷ் கனகராஜ் முதல்முறையாக இணையும் இத்திரைப்படம், மைத்திரி மூவி மேக்கர்ஸ் நிறுவனத்தின் தயாரிப்பில் பிரம்மாண்டமாக உருவாகிறது. இப்படத்தின் அறிவிப்பு டீசரில் இடம்பெற்ற “ஏஏ23” (#AAA23) மற்றும் “ஸ்ட்ரைவ் ஃபார் கிரேட்னஸ்” (Strive for Greatness) ஆகிய வரிகள் இளைஞர்களிடையே பெரும் வரவேற்பைப் பெற்றுள்ளன. இதன் காரணமாக, பல சினிமா ரசிகர்கள் மற்றும் பிரபலங்கள் இந்த இசையைப் பயன்படுத்தி ஆக்கப்பூர்வமான வீடியோக்களைப் பகிர்ந்து வருகின்றனர்.
சமீபகாலமாக ஒரு படத்தின் முதல் பார்வை அல்லது அறிவிப்பு வெளியாகும் போதே அதன் இசை ட்ரெண்டிங்கில் முதலிடம் பிடிப்பது அரிதான ஒன்றாகக் கருதப்படுகிறது. ஆனால், அனிருத் இசையமைப்பில் உருவான இந்த ஏஏ23 தீம், வெளியான சில நாட்களிலேயே இன்ஸ்டாகிராம் ஆடியோ தரவரிசையில் முதலிடத்தைப் பிடித்துள்ளது. 2026-ஆம் ஆண்டு ஆகஸ்ட் மாதம் இப்படத்தின் படப்பிடிப்பு தொடங்கப்பட உள்ள நிலையில், தற்பொழுதே கிடைத்துள்ள இந்த சமூக வலைதள ஆதரவு படக்குழுவினருக்குப் பெரும் உற்சாகத்தை அளித்துள்ளது.
ஸ்ரீ. இவர் டிஜிட்டல் செய்தி துறையில் துறையில் 8 ஆண்டுகள் அனுபவம் பெற்றவர். குறிப்பாக தமிழில் முன்னணி பத்திரிக்கைகளின் இணையதள் செய்தி பிரிவில் ஆசிரியராக பணியாற்றிய அனுபவம் கொண்டவர். சினிமா, அரசியல் சார்ந்த செய்திகள் வழங்குவதில் ஆர்வம் உள்ளவர்.
