தமிழ் சினிமாவில் ‘அசுரன்’ படத்தின் மூலம் கவனம் ஈர்த்து, சமீபத்தில் வெளியான ‘யூத்’ (Youth) திரைப்படத்தின் பிரம்மாண்ட வெற்றிக்குப் பிறகு முன்னணி இளம் நடிகராக உருவெடுத்துள்ளார் கென் கருணாஸ். இந்தப் படத்தின் வெற்றிக்குப் பிறகு இவரைத் தங்கள் படங்களில் ஒப்பந்தம் செய்யப் பல முன்னணி தயாரிப்பு நிறுவனங்கள் ஆர்வம் காட்டி வருகின்றன. ஆனால், தற்போது கென் கருணாஸ் விதித்துள்ள ஒரு புதிய நிபந்தனை கோலிவுட் வட்டாரத்தில் பெரும் விவாதத்தைக் கிளப்பியுள்ளது.
கிடைத்துள்ள தகவல்களின்படி, கென் கருணாஸ் தான் நடிக்கும் அனைத்துப் படங்களையும் தனது சொந்த தயாரிப்பு நிறுவனமான ‘ஸ்ட்ரீட் பாய் ஸ்டுடியோஸ்’ (Street Boy Studios) மூலம் ‘ஃபர்ஸ்ட் காப்பி’ (First-copy agreement) அடிப்படையில் மட்டுமே செய்து தர முன்வந்துள்ளார். அதாவது, படத்தின் மொத்த தயாரிப்புப் பொறுப்பையும் தனது நிறுவனமே ஏற்கும் என்றும், தயாரிப்பு நிறுவனம் அதற்கான முதலீட்டை மட்டும் வழங்கினால் போதும் என்ற அடிப்படையில் அவர் பேசி வருகிறார்.
இந்த அதிரடி நிபந்தனையால், அவரை ஒப்பந்தம் செய்யத் தயாராக இருந்த சில பெரிய நிறுவனங்கள் தற்போது சற்று பின்வாங்கியுள்ளதாகத் தெரிகிறது. பொதுவாக வளர்ந்து வரும் நடிகர்கள் பெரிய நிறுவனங்களின் நேரடி தயாரிப்பில் நடிக்கவே விரும்புவார்கள். ஆனால், ஆரம்பத்திலேயே தயாரிப்பு மற்றும் நிர்வாகத்தில் தனது கட்டுப்பாட்டைக் கொண்டு வர கென் முயற்சிப்பது பலரையும் வியப்பில் ஆழ்த்தியுள்ளது.
இருந்தாலும், ‘யூத்’ படத்தின் மார்க்கெட் வேல்யூ காரணமாக சில நிறுவனங்கள் இந்த நிபந்தனையை ஏற்றுக்கொள்வது குறித்துத் தீவிரமாக ஆலோசித்து வருகின்றன. தனது திரைப்பயணத்தில் மிக முக்கியமான கட்டத்தில் இருக்கும் கென் கருணாஸ், இந்தப் பிடிவாதத்தின் மூலம் ஒரு வெற்றிகரமான தயாரிப்பாளராகவும் உருவெடுப்பாரா என்பதைப் பொறுத்திருந்துதான் பார்க்க வேண்டும்.
