“ராஜா ராணி” திரைப்படத்தின் மூலம் தமிழ் சினிமாவில் அறிமுகம் கிடைத்தவர் அட்லீ. இளம் வயதுடைய ரசிகர்களை தனது காதல் காட்சிகளாலும், சாதூர்யமான திரைக்கதை, வசனங்கள், காட்சி அமைப்பினாலும் தன் வசம் ஈர்த்துக் கொண்டவர்.
தனது முதல் படத்தையே ‘ஹிட்’படமாக்கிய இவருக்கு விஜயுடன் தொடர்ச்சியாக இணைய வாய்ப்பு கிடைத்தது. இவர்கள் இருவரின் காம்பினேஷனில் வந்த படங்கள் அனைத்துமே சூப்பர் ஹிட். பாடல், நகைச்சுவை என அனைத்திற்கும் மிகப் பெரிய வரவேற்பு கிடைத்தது.
பிரம்மாண்ட இயக்குனர் சங்கரிடம் உதவி இயக்குனராக பணியாற்றியவர் அட்லி. “எந்திரன்” படத்தில் ரஜினிகாந்தின் முடி அலங்காரத்தை கவனித்துக் கொள்வது தான் இவரின் வேலையாம். ஷங்கரின் உதவி இயக்குனர்களில் இவருக்கு கடைசி வரிசையில் தான் இடமாம்.
கடை கோடி ஊழியனாக இருந்த போதும் ஷங்கரிடமிருந்து நிறைய கற்றுக்கொள்ள வேண்டும் என்கின்ற ஆர்வத்தில் பணியை மகிழ்வோடு செய்து வந்தாராம். விஜய் நடித்த “நண்பன்” திரைப்படத்தில் இவர் உதவி இயக்குனர்களில் முதல் நபராக மாறினாராம். அந்தப் பொறுப்பையும் உரிமையையும் ஷங்கர் வழங்கியது தனக்கு கிடைத்த அங்கீகாரம் என மகிழ்ந்திருக்கிறார் அட்லீ.
ஷங்கரின் நுணுக்கங்களை அருகிலேயே இருந்து பார்த்ததால் தான் தன்னால் இன்று இப்படி ஒரு நிலையை அடைய முடிந்தாக பெருமிதத்தோடு தனது பேட்டி ஒன்றில் கூறியுள்ளார் அட்லீ. பாலிவுட் சூப்பர் ஸ்டார் ஷாருக்கானுடன் இவர் இணைந்த “ஜவான்” படம் ஆயிரம் கோடி வசூலை தாண்டிய படமாக அமைந்து, இவரது மார்க்கெட்டை வேற லெவலுக்கு கொண்டு சென்றது. அட்லீயுடன் இணைய வேண்டும் என முன்னணி நடிகர்கள் பலரும் வரிசையில் காத்து நிற்கின்ற இடத்திற்கு முன்னேறியுள்ளார்.
