தென்னிந்தியத் திரையுலகில் வித்யாசமான கதைகளைத் தேர்ந்தெடுத்து நடிப்பதில் பெயர்பெற்றவர் நடிகர் சந்தீப் கிஷன். சமீபகாலமாக அவரது படங்களுக்குத் தமிழகத்திலும் நல்ல வரவேற்பு கிடைத்து வருகிறது. இந்நிலையில், இன்று தனது பிறந்தநாளைக் கொண்டாடும் சந்தீப் கிஷனுக்கு வாழ்த்து தெரிவிக்கும் விதமாக, அவரது 33-வது திரைப்படமான #SK33 குறித்த பிரம்மாண்டமான புதிய அப்டேட் ஒன்றை படக்குழுவினர் வெளியிட்டுள்ளனர்.
இயக்குநர் யுவகந்தர் முனி இயக்கத்தில் உருவாகும் இந்தப் படம், ஒரு பிரம்மாண்டமான மிதாலஜிக்கல் ஃபேண்டஸி அட்வென்ச்சர் (Mythological Fantasy Adventure) திரைப்படமாகும். “நிசப்தத்தில் பிறந்து, காலங்களை வென்று, வரலாற்றில் எதிரொலிக்கப் போகிறான்” என்ற மிரட்டலான வாசகங்களுடன் இந்தப் புதிய போஸ்டர் மற்றும் அப்டேட் வெளியாகியுள்ளது. ஏற்கனவே ‘ஷாம்பலா’ (Shambala) போன்ற வெற்றிப் படங்களைக் கொடுத்த அதே ஆர்வமிக்க குழுவினர் இந்தப் படத்திற்காக மீண்டும் ஒன்றிணைந்துள்ளனர்.
View this post on Instagram
இந்தப் படத்தில் சந்தீப் கிஷன் முன்னெப்போதும் பார்த்திராத ஒரு போர்வீரன் கதாபாத்திரத்தில் நடிக்கவுள்ளார். அடர்ந்த காடுகளின் பின்னணியில், ஒரு புராணக்காலத்து வீரனின் எழுச்சியை மையமாகக் கொண்டு இதன் திரைக்கதை அமைக்கப்பட்டுள்ளது. “சிங்கங்கள், ஓநாய்கள், மன்னர்கள் மற்றும் வாள்கள்” என ஒரு புதிய உலகத்தை இயக்குநர் யுவகந்தர் முனி உருவாக்கியுள்ளதாகப் படக்குழு தெரிவித்துள்ளது. இதற்கான ஆரம்பக்கட்ட பணிகள் மற்றும் முதற்கட்ட படப்பிடிப்பு விறுவிறுப்பாக நடைபெற்று வரும் நிலையில், படத்தின் மேக்கிங் தரம் சர்வதேச அளவில் இருக்கும் எனத் தெரிகிறது.
ராஜசேகர் அன்னாபிமோஜு மற்றும் மஹிதர் ரெட்டி ஆகியோர் இணைந்து தயாரிக்கும் இந்தப் படம், சந்தீப் கிஷனின் கேரியரில் அதிக பொருட்செலவில் உருவாகும் படங்களில் ஒன்றாக இருக்கும் என எதிர்பார்க்கப்படுகிறது. இந்தப் படத்தில் சந்தீப் கிஷனின் லுக் மற்றும் ஆக்ஷன் காட்சிகள் ரசிகர்களுக்குப் பெரும் விருந்தாக அமையும் என்பதில் சந்தேகமில்லை. அவரது பிறந்தநாளையொட்டி வெளியான இந்த ‘லெஜண்ட்’ அப்டேட் தற்போது சமூக வலைதளங்களில் வைரலாகி வருகிறது.
