சினிமா உலகில் எப்போது என்ன நடக்கும் என்றே கணிக்க முடியாது என்பதற்குச் சிறந்த உதாரணமாகச் சீனாவுலிருந்து ஒரு புதிய செய்தி வெளியாகியுள்ளது. அடிப்படை 3டி அனிமேஷன் தொழில்நுட்பத்தில், பார்க்கவே விசித்திரமாகவும் சற்று வித்தியாசமாகவும் உருவாக்கப்பட்ட ‘Niu Lai’ என்ற குறைந்த பட்ஜெட் அனிமேஷன் படம் தற்போது பாக்ஸ் ஆபிஸில் மிகப்பெரிய வசூல் சாதனை படைத்து வருகிறது.
சுமார் 5 ஆண்டுகள் உழைப்பில் உருவானதாகக் கூறப்படும் இப்படத்தை இயக்குநர் சின் யூமெங் மற்றும் அவரது தாய் சன் லிஃபான் ஆகியோர் இணைந்து உருவாக்கியுள்ளனர். ஆரம்பத்தில் இப்படம் வெளியான முதல் 10 நாட்களில் படுதோல்வியைச் சந்தித்தது. சில நாட்களில் வெறும் 200 யுவான் (இந்திய மதிப்பில் தோராயமாக ரூ.2,400) மட்டுமே வசூலாகி தியேட்டர்களில் முடங்கியது. ஆனால், சோபாவில் அமர்ந்து கொண்டு நண்பர்களைக் கேலி செய்ய நினைத்த இளைஞர்கள் மற்றும் நெட்டிசன்களின் வரவால் நிலைமை முற்றிலுமாக மாறியது.
சமூக வலைதளங்களில் இப்படம் குறித்து வெளியான மோசமான மற்றும் கிண்டலான விமர்சனங்களே இதன் மிகப்பெரிய பலமாக மாறின. “நம்ப முடியாத அளவுக்கு மிக மோசமாக உள்ளது”, “இணைய ட்ரால் கலாச்சாரத்தின் உச்சம்” என நெட்டிசன்கள் இப்படத்தைக் கலாய்த்துத் தள்ளினர். இருப்பினும், இந்த விசித்திரமான விளம்பரத்தால் ஈர்க்கப்பட்ட சினிமா ரசிகர்கள் தியேட்டர்களை நோக்கிப் படையெடுக்கத் தொடங்கினர்.
இதன் விளைவாக, படத்தின் வசூல் மளமளவென உயர்ந்து தற்போது சுமார் 17.1 மில்லியன் யுவான் (இந்திய மதிப்பில் சுமார் ரூ.20 கோடிக்கும் அதிகம்) வசூலைக் குவித்து பாக்ஸ் ஆபிஸில் மிரட்டி வருகிறது. பார்வைக்கு விசித்திரமாக இருந்தாலும், இது போன்று இணையத்தில் வைரலாகும் மீம்களும், விமரிசனங்களும் ஒரு சாதாரண படத்திற்கு எத்தகைய கோடிகளைப் பெற்றுத் தரும் என்பதற்கு இப்படத்தின் வெற்றியே சாட்சியாகியுள்ளது.
