தமிழக சட்டமன்றத் தேர்தல் முடிவுகள் வெளியாகி, ஒட்டுமொத்த இந்திய அரசியலையும் அதிர வைக்கும் வகையில் நடிகர் விஜய்யின் தமிழக வெற்றி கழகம் (TVK) 108 இடங்களைக் கைப்பற்றி தனிப்பெரும் கட்சியாக உருவெடுத்துள்ளது. தமிழகத்தின் புதிய முதலமைச்சராக விஜய் (CM Vijay) பொறுப்பேற்றுள்ள இந்த வரலாற்றுச் சிறப்புமிக்க தருணத்தில், கோலிவுட்டின் முன்னணி இயக்குநரான மிஷ்கின் (Director Mysskin) விஜய்யின் அரசியல் வருகை மற்றும் அவரது அசாத்திய வெற்றி குறித்து மனம் திறந்து பேசியுள்ளார்.
“முதலமைச்சராகப் பொறுப்பேற்க விஜய் அனைத்து தகுதிகளும் கொண்டவர்; அன்று அவரை நான் மேடையில் லெஜண்ட் என்று அழைத்தபோது என்னை எதிர்த்தவர்கள் இன்று வாயடைத்துப் போயுள்ளனர்” என மிஷ்கின் தனது பேட்டியில் குறிப்பிட்டுள்ளார்.
முன்னதாக ஒரு பொது மேடையில் விஜய்யை மிஷ்கின் பாராட்டிப் பேசியபோது, படித்த ஒரு இயக்குநர் எப்படி இப்படிப் பேசலாம் எனப் பல தரப்பிலிருந்து விமர்சனங்கள் எழுந்தன. மேலும் விஜய் கட்சி ஒரு இரு இடங்களைக் கூட தாண்டாது என்றும், சினிமா வேறு, அரசியல் வேறு, என்றும் பல மேதாவிகள் விமர்சித்து வந்ததை அவர் சுட்டிக்காட்டியுள்ளார்.
தனது சொந்த அலுவலகத்திலேயே தினந்தோறும் விஜய் அரசியலுக்கு வருவது குறித்துப் பல விவாதங்களும் வாக்குவாதங்களும் நடந்ததாக மிஷ்கின் தெரிவித்துள்ளார். “அனைவரும் விமர்சித்துக் கொண்டிருந்த வேளையில் நான் அமைதி காத்தேன். ஆனால், சரியாக 15 நாட்களுக்கு முன்பு ஒரு சாதாரண விவசாயி என்னைச் சந்தித்து, விஜய் இந்தத் தேர்தலில் மிக எளிதாக 60 இடங்களுக்கும் மேல் வென்று சாதனை படைப்பார் என்று மிகத் துல்லியமாகக் கணித்தார். அப்போதுதான் எனக்குப் புரிந்தது, மேட்டிமைத்தனமான விமர்சகர்களை விட அடித்தட்டு மக்களுக்கு இந்த அரசியல் அலை மிக நன்றாகவே புரிந்திருக்கிறது” என்று அவர் நெகிழ்ந்துள்ளார்.
தேர்தல் முடிவுகள் வெளியாகி தமிழகத்தின் முதலமைச்சராக விஜய் அரியணை ஏறியிருப்பது ஒரு மாபெரும் அதிசயம் என்று மிஷ்கின் கொண்டாடியுள்ளார். ரஜினி, கமல், போன்ற திரையுலக ஜாம்பவான்களின் மத்தியில், விஜய்யின் இந்த அரசியல் அசுர வெற்றி கோலிவுட் மற்றும் அரசியல் வட்டாரங்களில் தற்பொழுது பிரதான பேசுபொருளாக மாறியுள்ளது. விஜய்யின் அரசியல் எதிர்காலத்தைக் கேலி செய்தவர்கள் இன்று இந்த தேர்தல் முடிவுகளைப் பார்த்துவிட்டு முழுமையான அதிர்ச்சியில் உறைந்து போயுள்ளனர் என்று மிஷ்கின் தனது பாணியில் அதிரடியாகத் தெரிவித்துள்ளார்.
