சுதந்திர தின விடுமுறை… சென்னையில் இருந்து இன்று முதல் சிறப்பு பேருந்துகள்… போக்குவரத்து கழகம் அறிவிப்பு…!

தொடர் விடுமுறை மற்றும் பண்டிகை காலங்களின் போது மக்கள் தங்களது சொந்த ஊர்களுக்கு செல்வதற்கு ஆசைப்படுவார்கள். இந்நிலையில் சுதந்திர தினம் மற்றும் தொடர் விடுமுறை காரணமாக சிறப்பு பேருந்துகள் தொடர்பான அறிவிப்பை மாநகரப் போக்குவரத்துக் கழகம் அறிவித்திருக்கின்றது.

இது தொடர்பாக அரசு விரைவு போக்குவரத்து கழகம் வெளியிட்டுள்ள செய்தி குறிப்பில் தெரிவித்திருப்பதாவது: “சுதந்திர தினம் மற்றும் தொடர் விடுமுறையை முன்னிட்டு இன்று புதன்கிழமை முதல் சென்னையிலிருந்தும் மற்றும் பிற இடங்களில் இருந்தும் தினமும் இயக்கப்படும் பேருந்துகளுடன் கூடுதலாக சிறப்பு பேருந்துகள் இயக்கப்படும்.

அதன்படி சென்னை கிளாம்பாக்கத்தில் இருந்து திருவண்ணாமலை, திருச்சி, கும்பகோணம், மதுரை, திருநெல்வேலி, நாகர்கோவில், கன்னியாகுமரி, தூத்துக்குடி, கோயம்புத்தூர், சேலம், ஈரோடு, திருப்பூர் ஆகிய இடங்களுக்கு இன்று (புதன்கிழமை) 470 பேருந்துகளும் , நாளை மறுநாள் (வெள்ளிக்கிழமை) மற்றும் சனிக்கிழமை 365 பேருந்துகளும் இயக்க திட்டமிடப்பட்டுள்ளது.

மேலும், சென்னை கோயம்பேட்டிலிருந்து திருவண்ணாமலை, நாகை, வேளாங்கண்ணி, ஓசூர், பெங்களூரு ஆகிய இடங்களுக்கு இன்று (புதன்கிழமை) 70 பேருந்துகளும், நாளை மறுநாள் (வெள்ளிக் கிழமை) மற்றும் சனிக்கிழமை 65 பேருந்துகளும் இயக்கப்பட உள்ளன. பெங்களூர், திருப்பூர், ஈரோடு மற்றும் கோவை ஆகிய இடங்களிலிருந்தும் பல்வேறு இடங்களுக்கும் 200 சிறப்பு பேருந்துகளும் , மாதவரத்திலிருந்து இன்று , வெள்ளி மற்றும் சனிக்கிழமை ஆகிய நாட்களில் 20 சிறப்பு பேருந்துகளும் என மொத்தம் 1,190 சிறப்பு பேருந்துகள் இயக்கப்படுகிறது. மேலும், ஞாயிற்றுக்கிழமை சொந்த ஊர்களிலிருந்து சென்னை மற்றும் பெங்களூர் திரும்ப வசதியாக பயணிகளின் தேவைகேற்ப அனைத்து இடங்களிலிருந்தும் சிறப்பு பேருந்துகள் இயக்கப்படும் ” என்று அந்த செய்தி குறிப்பில் தெரிவிக்கப்பட்டுள்ளது.