இஸ்லாமிய சகோதரர்களுக்கு… முதல்வர் மு.க.ஸ்டாலின் மிலாடி நபிக்கு வாழ்த்து…!

இஸ்லாமிய சகோதரர்களுக்கு முதல்வர் மு க ஸ்டாலின் மிலாடி நபி வாழ்த்துக்களை தெரிவித்து இருக்கின்றார். இது தொடர்பாக அவர் வெளியிட்டுள்ள வாழ்த்துச் செய்தியில் தெரிவித்திருந்ததாவது “நபிகள் நாயகத்தின் பிறந்த நாளை சிறப்பாக கொண்டாடும் இஸ்லாமிய சகோதரர்கள் அனைவருக்கும் எனது இனிய மிலாடி நபி நல்வாழ்த்துக்கள் தெரிவித்துக் கொள்கிறேன்.

மனிதர்களிடையான வேற்றுமைகளை களைந்தெறியவும், அடிமை வணிகம் உள்ளிட்ட சமூக அநீதிகளுக்கு எதிராகவும் குரல் கொடுத்தவர் நபிகள் நாயகம். அவரது போதனைகள் அமைதியான சமத்துவ உலகுக்கு வழிகாட்டும் நெறிமுறைகள் ஆகும். உழைப்பவர்களின் கூலியை அவர்களது வியர்வை உளறும் முன்பே கொடுத்து விடுங்கள் என்று எளியவர்களுக்காக பேசியவர்.

உங்களை நீங்களே பெருமைப்படுத்தி கொள்ள வேண்டாம் என பணிவுடமையை வலியுறுத்தியவர். “கற்றவண்ணம் நடப்பவரே உண்மையில் கற்றவர்” என வாழ்க்கைக்கான நெறிமுறையை வகுத்துக் காட்டினார். அவர் காட்டிய வழியில் வறியவர்க்கு உதவுவது, இயற்கைச் சீற்றம், பெருந்தொற்று உள்ளிட்ட நெருக்கடியான காலங்களில் தன்னலமற்று மக்களுக்காகச் சேவையாற்றுவது, பசித்தோருக்கு உணவளிப்பது என இசுலாமிய மக்கள் வாழ்ந்து சமூக நல்லிணக்கத்தைப் பேணி வருகின்றனர்.

அத்தகைய இஸ்லாமிய மக்களுக்கு மிலாடி நபி வாழ்த்துக்கள். இஸ்லாமிய மக்களின் பாதுகாவலனாக, அவர்களின் சகோதரனாக என்றும் நிற்கும் இயக்கமான திராவிட முன்னேற்றக் கழக அரசின் சார்பில் மீண்டும் எனது மிலாடி நபி வாழ்த்துக்களை தெரிவித்துக் கொள்கின்றேன்” என்று அவர் தெரிவித்து இருக்கின்றார்.