விஜய், முரளி, அர்ஜுன் போன்ற நடிகர்களுக்கு மெகா ஹிட் திரைப்படங்களை கொடுத்தவர் விக்ரமன். சரத்குமாருக்கு என்றும் பெயரை சொல்லும் “சூரியவம்சம்” என்ற மெகா ஹிட் திரைப்படத்தை இயக்கிய வரும் இவரே.
விக்ரமனின் மகன் விஜய் கனிஷ்கா ஹிட்-லிஸ்ட் படத்தின் மூலம் கதாநாயகனாக தமிழில் அறிமுகமாகி இருக்கிறார். கே.எஸ்.ரவிக்குமார் படத்தை தயாரித்திருக்க, அவரிடம் உதவி இயக்குனர்களாக இருந்த சூர்ய கதிர் காக்கிலார், கார்த்திகேயன் இயக்கி உள்ளார்கள். சத்யா படத்திற்கு இசையமைத்துள்ளார்.
ஐ.டி கம்பெனியில் பணிபுரியும் சாதுவான பையன் விஜய். முகமூடி அணிந்த மர்ம நபர் விஜயின் தாய் மற்றும் சகோதரியை கடத்திச் செல்கிறார். தான் சொல்லும் வேலைகளை செய்யாவிட்டால் அவர்களை கொன்று விடுவதாக மிரட்டுகிறார். கொலை வரை செய்ய தூண்டப்படுகிறார் ஹீரோ.
இப்படி முகமூடிக்குள் தனது கோர முகத்தை மறைந்திருக்கும் வில்லன் யார். இதிலிருந்து விஜய் எப்படி மீள்கிறார் என்பதை தான் காட்டியிருக்கிறார்கள் இயக்குனர்கள்.
மிரட்டலுக்கு கொஞ்சம் கொஞ்சமாய் அடிபணிந்த விஜய் முகமூடி வில்லனிடம் சரண்டர் ஆகிறாரா? அல்லது தனது வீர செயல்களால் தாய்,தங்கையை காப்பாற்றி மீண்டும் தனது இயல்பு வாழ்க்கைக்கு மாறுகிறாரா? என்பதை சொல்வது தான் படம்.
சரத்குமார்,கௌதம் வாசுதேவ் மேனன், முனீஸ்காந்த், ரெட்டின் கிங்ஸ்லி, ஸ்மிருதி வெங்கட், ஐஸ்வர்யா தத்தா என பலரும் இந்த படத்தில் விஜய் கனிஷ்காவுடன் இணைந்துள்ளனர்.
சஸ்பென்ஸ் திரில்லராக வந்துள்ளது இந்த படம். முதல் பாதையினுடைய விறுவிறுப்பு இரண்டாம் பாதியில் இருந்திருந்தால் படத்தின் ரசிப்பு தன்மை இன்னும் உயர்ந்திருக்கும். பின்னணி இசை ஆறுதல் தருகிறது. பாடல்கள் பெரிதாக கவரவில்லை.
ஆங்காங்கே லாஜிக் குறைபாடுகள் தென்பட்டாலும், இரண்டாவது பாதியின் வேகம் சற்று குறைவாகவே இருந்தாலும் சரத்குமாரின் உதவியால் நல்ல துவக்கத்தை பெற்றுள்ளார் விஜய் கனிஷ்கா.
ஹிட் லிஸ்ட் – இன் குட் லிஸ்ட் தமிழ் சினிமாவில்.
