கணவர்கள் முட்டாள் சோம்பேறிகள் என்று கூறும் வகையில் விளம்பர வீடியோ வெளியாகி சர்ச்சையான நிலையில் தற்போது flipkart நிறுவனம் மன்னிப்பு கேட்டுள்ளது.
இந்தியாவின் முன்னணி இ-காமஸ் நிறுவனங்களில் ஒன்று பிலிப்கார்ட் நிறுவனம். தங்களின் வாடிக்கையாளர்களை ஈர்ப்பதற்காக சிறப்பு தள்ளுபடி நாட்களை அறிவித்து வருடா வருடம் நடத்தி வருகின்றது. அவ்வாறு பிலிப்கார்ட் பிக் பில்லியன் டே சேல்ஸ் என்ற ஆபர் அறிவிக்கப்பட்டுள்ளது. இந்த பிக் பில்லியன் டேஸ் ஆஃபர் நேற்று தொடங்கி வரும் அக்டோபர் 6-ம் தேதி வரை இருக்கும் என கூறப்படுகின்றது.
இந்நிலையில் பிக் பில்லியன் டேஸ் விளம்பரத்திற்காக ப்ளிப்காட் வெளியிட்டுள்ள வீடியோ தான் சர்ச்சையை ஏற்படுத்தி இருக்கின்றது. இந்த அனிமேஷன் வீடியோவில் கணவர்கள், சோம்பேறிகள், துரதிஷ்டம் பிடித்தவர்கள், முட்டாள்கள் என்று சித்தரிக்கும் வகையில் வீடியோ இருந்ததால் சர்ச்சையாகி இருக்கின்றது.
கணவர்களுக்கு தெரியாமல் மனைவிகள் எப்படி ரகசியமாக ஹேண்ட் பேக்குகளை வாங்குகிறார்கள் என்பது தொடர்பாக அந்த வீடியோ ப்ரொமோஷனுக்காக உருவாக்கப்பட்டது. இந்த வீடியோவுக்கு சமூக வலைதள பக்கங்களில் கடும் கண்டனங்கள் இருந்தன என்று ஆண்கள் நல சங்கமும் கண்டனம் தெரிவித்த நிலையில் அந்த வீடியோவை நீக்கிய flipkart நிறுவனம் பொதுவெளியில் மன்னிப்பு கேட்டுள்ளது. இது தொடர்பாக தனது சமூக வலைதள பக்கங்களிலும் மன்னிப்பு கேட்டுள்ளது flipkart நிறுவனம்.
