குஜராத் வெள்ளத்தில் சிக்கிய தமிழக பக்தர்கள் பேருந்து… அனைவரும் பத்திரமாக மீட்பு…!

தமிழகத்தை சேர்ந்த 55 பக்தர்கள் சென்ற சொகுசு பேருந்து வெள்ளத்தில் சிக்கி மீட்கப்பட்ட சம்பவம் அதிர்ச்சியை ஏற்படுத்தியிருக்கின்றது.

குஜராத்தில் தொடர்ந்து கன மழை பெய்ததால் ஆற்றில் வெள்ளம் பெருக்கெடுத்து ஓடுகின்றது. இதனால் பாவ்நகர் மாவட்டத்தில் உள்ள ஆற்றில் தண்ணீர் அதிக அளவில் சென்று கொண்டிருக்கின்றது. தமிழகத்தை சேர்ந்த 55 பக்தர்கள் சென்ற சொகுசு பேருந்து கோலியாக் கிராமத்தில் உள்ள தரைபாலத்தை கடக்க முயன்றது. அப்போது எதிர்பாராத விதமாக தரைப்பாளத்தின் வெள்ளத்தில் சிக்கிக் கொண்டது.

இது தொடர்பாக உடனடியாக பேரிடர் மீட்பு குழுவினருக்கு தகவல் கொடுக்கப்பட்டது. பின்னர் சம்பவ இடத்திற்கு விரைந்து வந்த பேரிடர் மேலாண்மை பிரிவு படையினர் தரைப்பாலத்தில் வெள்ளத்தில் சிக்கிய தமிழக பக்தர்களை ட்ரக் மூலம் மீட்கும் பணியில் ஈடுபட்டார்கள். ட்ரக் மூலம் பேருந்தின் அருகே சென்று கண்ணாடியை உடைத்து ஜன்னல் மூலமாக பயணிகள் அனைவரையும் மீட்கும் பணி நடைபெற்றது.

நீண்ட நேரம் போராட்டத்திற்கு பிறகு பேருந்தில் இருந்த அனைவரும் மீட்பு குழுவினரால் பத்திரமாக மீட்கப்பட்டன. தமிழக பக்தர்கள் கோலியாக் கிராமத்திலிருந்து அருகிலுள்ள நிஷ்கலங் மகாதேவ் கோயிலுக்கு சென்று விட்டு பாவ்நகரை நோக்கி திரும்பும் போது தான் இந்த சம்பவம் அரங்கேறியதாக பாவ்நகர் பேரிடர் மேலாண்மை மேற்கு பிரிவு துணை மமலதார் சதீஷ் ஜம்புச்சா தெரிவித்து இருக்கின்றார்.